использование материалов разрешено только со ссылкой на ресурс cossackdom.com

Соболізнуем велце смерти блаженной памяти ясне освіцоного его милости пана Синявского, каштеляна краковскаго, гетмана великого коронного, нам велце особливаго добродія а милого втораго отца велможности вашей панской, которий завше бивало на нас, Войско Запорожское Низовое, во всяких до него случаях чи на окказиах милостивий взгляд мает и задосит чинит, а найпаче и пана Нихимовского, знатного в Войску Запорожском бунчукового товариша, в ділех войскових до его королевского величества и прествітлой Річи Посполитой полской посланного, особливе милостистивним своїм защитом и протекциею панскою сохранив и до рук неприятелских московских на муки не подал, за що ми, атаман кошовий, и все Войско Запрожское Низовое иним не можем учинити благодарствие и услугу, токмо зічи царства небеснаго. А велможност ваша в ланской просим покорне войсковую нашу вносячи причину, абыс хтіл велможност ваша в ласці и респекті своем милостивом его ж, пана Нахимовского заховувати, а мі, Войском цілим Запорожским обіщаемся услугами нашими в потребах его панских нагородити, которому и ми, Войско, в милостивое призрение отдаючися, зостаем навсегда.

Пры всегдашной моей до вашої мости сусідской зычливости, яко то надіюсь, же и ваша мость до нас можете показать приязнь, для чого теж и пишем, мы, атаман кошовий Войска Запорожского Низового, стороны нашего товариша войскового, а курінного пластуновского Степана Литвина, которий, будучи тамо в державы вашмостиной, в селі Степановці, и в тамошного жителя, именно в Якова Белченка, мырочника, вимінял за кляч в него коня. Якого то коня міняючи, он, Белченко, говорил, же во всем праві свыдомий; и тако то, по его словах за свідомом товариш наш продал жителю мошенскому Хведору Каракозенкові. А же в мошенского жителя познато того коня в Киеві, с которим еще конем трое, оріхов тисяч 10, футро сібірковы и протчее забрато и отобрано в Киеві того коня с превеликою чинящоюся за оной трудностю; який то Хведор, приехавши с Киева с поважним его милости пана войта киевского листом до нас, атамана кошового, просячи на нашого товариша справедливости; с котораго и учинилисмо так, и веліли оному мошенскому жителю уплатит ему талярей 18; и погодивши, товариш наш во всем оного, и того рады з сим нашим писанием, посилаем его ж, своего товариша; которому рачте ваша мость, яко ожалованному, вчинит слушную сатысфакцию, призвавши поменного своего подданого, приказат, чтоб ему, Степану, грошей, талярей 18, всеконечне уплатил и во всем спокоїл; а он по выводі, от кого того коня міл, на том искат должен своего; если ж ваша мость нашему сего оказателсві не дасте справедлмвости, то может и мы иначе поступит, си  есть забіт  учиным, встиким  невинним до нас приежджаючим людем. Тое вашей милости, милостивому пану, предложивши, зостаю назавше зичливим яко и естем.